Հայհոյանքներ, գրաֆիտիներ ու անպարկեշտ նկարներ. ի՞նչ կարելի է տեսնել Օպերայի բակում (լուսանկարներ)
Բավական է քայլել Օպերայի տարածքում, մոտենալ Հովհաննես Թումանյանի ու Ալեքսանդր Սպենդիարյանի արձաններին ու կտեսնես վանդալիզմի ամենադասական դրսևորումները: Մշակույթի նախարարության վերահսկողության տակ գտնվող արձանների պատվանդաններին ամենատարբեր գրառումներ են, խզբզոցներ ու անգամ հայհոյանքներ: Ուշադիր տեսնելուց ու գրառումները կարդալուց հետո կարելի է հետևություն անել, որ գրառումները կատարում են հիմնականում դեռահասները:
Տարածքում ծառայություն իրականացնող ոստիկանները NEWSPRESS.am-ի հետ զրույցում ընդգծեցին, որ իրենք հետևում են ու կանխում, որ խուլիգանություններ տեղի չունենան, սակայն առավոտյան գալիս են ու տեսնում, որ խուլիգանությունն արվել է գիշերը:
Մի քանի տարի առաջ Օպերայի ստորին պատերի ու արձանների վրայի գրառումներն այնքան էին շատացել, որ Մշակույթի նախարարությունը քայլեր ձեռնարկեց ու մաքրեց այդ ամենը: Հիմա նորից նույն պատմությունն է, ու հայ հանճարների արձանների պատվանդաններին կարելի է տեսնել սիրային խոստովանություններ, գրաֆիտիներ, հայհոյանքներ ու բազմաժանր նկարներ:
Վանդալիզմի դեպք էր նաև 2013 թվականին Գառնու հեթանոսական տաճարում տեղի ունեցածը, երբ ռուս զբոսաշրջիկը գրառումներ էր արել տաճարի պատին: Տարածքում տեղադրված տեսախցիկների օգնությամբ ոստիկանությունը կարողացավ գտնել զբոսաշրջիկին և պատասխանատվության ենթարկել:
21-րդ դարում բարդ չէ տեսախցիկներ տեղադրելը, վերահսկողություն իրականացնելն ու հանցանք իրականացնողներին հայտնաբերելը, մանավանդ որ հուշարձանները գտնվում են Երևանի սրտում՝ Օպերայի և բալետի ազգային ակադեմիական թատրոնի դիմաց: