Ի՞նչ քաղտեխնոլոգիական մեթոդ կիրառեց Փաշինյանն այսօր՝ դաշնակցական երիտասարդների հետ հանդիպմանը
Նիկոլ Փաշինյանի այսօրվա հանդիպումը դաշնակցական երիտասարդների հետ, ովքեր պահանջում են ԿԳՄՍ նախարար Արայիկ Հարությունյանի հրաժարականը, բավական հետաքրքիր էր և ձևի և բովանդակության առումով։
Հասկանալի է, որ առաջիկայում, գոնե այս բողոքի ալիքի վրա, նա Արայիկ Հարությունյանին չի հանի պաշտոնից։ Մյուս կողմից էլ, հաշվի առնելով հատկապես ՀՅԴ ազդեցությունը Սփյուռքում ու այլ երկրների պառլամենտներում ներկայացվածությունը կփորձի որոշակի փոքրիկ նահանջումներով հարցը լուծել, թեկուզ շահարկելով բուհերի ինքնավարությունը ու հարցը թողնելով արդեն ամեն բուհի ղեկավար կազմի վրա։
Սակայն հետաքրքիր է այստեղ այն, որ ամեն դեպքում փորձեց նախ լսել բողոքավորներին ու լսելով հանդերձ հասկանալ, թե կոնկրետ ինչ քաղաքական պատրաստվածության ինչ տեսակի խումբ է այս պահին հավաքված։ Սա շատ կարևոր է ռևիզիայի առումով, քանի որ արդեն հասկանալով, ժողովրդի լեզվով ասած, թե ինչ «մասսայի» հետ գործ ունի, նա շատ արագ կկարողանա տրանսֆորմացնել իր բառապաշարը, հայտարարությունների տերմինաբանությունը, տոնայնությունը կամ բովանդակային նրբությունները։
Այստեղ կարող ենք ասել, որ աշխատեց ոչ թե վարչապետ Փաշինյանը, այլ լրագրող Նիկոլի հոտառությունը։ Նույնիսկ զրույցի պահին նա արդեն փորձեց առաջին մեսիջը տալ, որ ինքը խոսել է այն մասին, որ պետք է թագավորների մասին ֆիլմեր նկարահանել։Սա արդեն փոքրիկ Օվերտոնի պատուհան էր, որը կարելի է ասել գաղափարական առումով ապագայում աճեցվելու է ու ծածկի բողոքի ալիքը այն առւմով, թե ինչպես կառավարությունը զուտ միջպետական ու այլ հարցերից ելնելով ֆինանսավորել է ֆիլմ, որը հայաստանյան հասարակության կողմից անընկալելի է, սակայն նաև նույն կառավարությունը հարյուր տոկոսով, օրինակ ֆինանսավորելու է, որպեսզի նկարահանվի ֆիլմ Տիգրան Մեծի կամ Տրդատ Մեծի ու Գրիգոր Լուսավորչի մասին, վերջինը հատկապես նաև որպես հակափաստարկ կլինի եկեղեցու պատմությունը դպրոցական ծրագրից հանելու ու հայոց պատմության հետ համատեղ ուսումնասիրելու հետ կապված որոշմանն ուղղված քննադատություններին։
Սա բավական նուրբ ու հետաքրքիր քաղաքական տեխնոլոգիա էր, որը կիրառվեց, ու անպայման զարգացում է տրվելու առաջիկայում, թեկուզ լայվերից մեկի ժամանակ։
Յակոբ Բերգեր