Սկանդալային տեսանյութեր, որոնք կհրապարակվեն ծայրահեղ դեպքում. hraparak.am
Երկրում կատարվող իրադարձությունների անկանխատեսելի ընթացքը, քրեական գործեր հարուցելու, կալանավորելու անսպասելի որոշումները, ինքնասպանությունները որոշակի նոր մշակույթ են ձևավորում մեզանում։
Այդ մասին գրում է hraparak.am-ը, որի աղբյուրների համաձայն, այն անձինք, ովքեր վտանգ են զգում, որ կարող են իրենց կալանավորել, իրենց հետ կարող են դժբախտ պատահարներ լինել և այլն, գաղտնի տեսաուղերձներ են նկարահանում և մի քանի տեղում պահում դրանց պատճեները, որ ծայրահեղ դեպքերում դրանք հրապարակվեն։
Կայքի տեղեկություններով, նման տեսաուղերձ է նկարահանվել նաև Մանվել Գրիգորյանի մասնակցությամբ, ում մոտ մեկ ամսով գրավի դիմաց ազատ արձակեցին, ապա կրկին կալանավորեցին։ Այդ ընթացքում նա տեսախցիկի առաջ պատմել է ինչ-որ մանրամասներ, որոնք պետք է հրապարակվեն՝ եթե իր հետ ինչ-որ բան պատահի։ Այդ տեսաերիզը պահվում է մի քանի վայրերում, այդ թվում՝ արտերկրում։ Կայքի աղբյուրը տեղյակ չէր, թե ինչին է վերաբերվում խոսքը, սակայն ենթադրություն արեց, որ գեներալ Մանվելը խոսել է Մարտի 1-ի մասին։
Ըստ նույն աղբյուրի, նման տեսանյութեր ունի նկարահանած նաև ԱԱԾ նախկին ղեկավար Արթուր Վանեցյանը։ Աշխատանքից ազատվելուց հետո, երբ իշխանական քարոզչամեքենան նրա մասին սկսեց նեգատիվ նյութեր տարածել և լուրեր շրջանառվեցին, որ նրան կալանավորելու են, նա մի քանի ֆիլմեր է նկարահանել, որ եթե իր հետ որևէ անկանխատեսելի բան պատահի, դրանք իր մերձավորները հրապարակայնացնեն։
Այդ ֆիլմերը ևս մի քանի օրինակից բազմացվել են և տարբեր ապահով վայրերում պահվում են։