Փաշինյանի համար նոր ինքնաթիռ գնելու տարբերակ է քննարկվում
Կառավարությունում որոշել են նոր ինքնաթիռ գնեն վարչապետի համար։ Այս մասին լրագրողների հետ զրույցում ասաց վարչապետի աշխատակազմի ղեկավար Էդուարդ Աղաջանյանը։ Նրա խոսքով` այս պահին քննարկվում են տարբերակներ։
«Նոր ինքնաթիռի գնման տարբերակն է քննարկվում, որովհետև գործող ինքնաթիռը բավականին հին է և արդեն որոշ ստանդարտներին չհամապատասխանող։ Նաև նորագույն, նոր տեխնոլոգիաների առկայության պարագայում ծախսի տեսանկյունից, վառելիքի ծախսի տեսանկյունից, ընթացիկ վերանորոգումների ծախսերի տեսանկյունից, շատ ավելի նպատակահարմար կարող է լինել նոր ինքնաթիռի ձեռք բերումը։ Բայց սա դեռ վերջնական որոշում է, սա ընդհանրապես դեռ որոշում չէ»,- նշեց նա:
Պարզվում է, որ սեպտեմբերին կայացած թռիչքի պատճառը դարձյալ օդանավի «հին» լինելն էր։ Հիշեցնենք, որ Փաշինյանի թռիչքն ԱՄՆ՝ արժեցել է մոտ 160 միլիոն դրամ։
Այժմ Աղաջանյանը վստահեցնում է, որ Փաշինյանի ծառայողական ինքնաթիռով թռիչք կազմակերպելն անհնար է, որովհետև վարչապետին սպասարկող օդաչուները չունեն օվկիանոսը հատելով թռիչք կատարելու լիցենզիա:
Ինչ վերաբերում է վարչապետի ինքնաթիռում վառելիքի հավելյալ բաքերի տեղադրման մասին առաջարկին, ապա Աղաջանյանը նկատում է, որ դա ծախսատար է և կարող է միլիոնավոր դոլարների ծախսի պատճառ դառնալ։