Քննարկվել են ԵՏՄ-ի հետ Մեծ Բրիտանիայի հարաբերությունների զարգացման ապագան․ ԵՀՄՖ
Երեկ՝ հոկտեմբերի 28-ին Լոնդոն այցի ընթացքում ԵՀՄՖ նախագահ և PANAP-ի («Քաղաքական և տնտեսական վերլուծության ու կանխատեսման պան-եվրոպական կենտրոն») համանախագահ դոկտոր Աշոտ Գրիգորյանին ընդունեց Միացյալ Թագավորության Համայնքների պալատի անդամ, Էներգետիկայի և կլիմայական փոփոխությունների ստվերային նախարար (Լեյբորիստական կուսակցություն) և Լեյբորիստների առաջնորդ Ջերոմի Քորբինի խորհրդական՝ Նորին գերազանցություն դոկտոր Ալլան Ուայթհեդը։ Այս մասին տեղեկանում ենք Եվրոպայի հայերի միության ֆորումի ֆեյսբուքի էջից։
Հաղորդագրության մեջ մասնավորապես ասվում է․
«Պրն․ Գրիգորյանը հանդիպման ընթացքում անդրադարձավ Հայաստանում Ամուլսարի ոսկու հանքավայրի շահագործման խնդրին։ Դոկտոր Ուայթհեդն իր անկեղծ մտահոգությունը հայտնեց Հայաստանում նոր հանքի շահագործման ծրագրի վերաբերյալ, որն իրական աղետ կարող է լինել Հայաստանի պես փոքրիկ երկրի էկոլոգիայի համար։ Կողմերը պայմանավորվածություն ձեռք բերեցին՝ պրն․ Գրիգորյանի հաջորդ հանդիպումը կազմակերպել Շրջակա միջավայրի պաշտպանության ստվերային նախարարի հետ՝ քննարկելու Ամուլսարի խնդրահարույց հարցը։
Հանդիպման ընթացքում քննարկվեցին Լոնդոն-Բրյուսել և Լոնդոն-Մոսկվա հարաբերությունները՝ կապված «բրեքսիթի»-ի (braxit - Միացյալ Թագավորության հեռացումը Եվրոպական Միությունից) և էներգետիկ անվտանգության խնդիրների հետ։ Դոկտոր Գրիգորյանը նախապես ներկայացրել էր իր գործընկերոջը էներգետիկ անվտանգության կոնցեպցիան՝ պատրաստված PANAP-ի փորձագետների կողմից։ Մանրամասն ուսումնասիրած լինելով փորձագիտական արդյուքները՝ պրն․Ուայթհեդն իր մեկնաբանությունները ներկայացրեց արծարծվող խնդրի շուրջ։ Նա պրն․ Գրիգորյանին ներկայացրեց նաև Լեյբորիստական կուսակացության՝ Մեծ Բրիտանիայի էներգետիկայի ոլորտի զարգացման տեսլականը մինչև 2036 թվականի ծրագրերը։ Ստորև կկցենք էներգիայի առաջնային պահանջարկի կանխատեսումների աղյուսակը։
Ըստ ծրագրերի՝ խիստ պակասեցվելու է ածխի օգտագործումը Մեծ Բրիտանիայում, մեծացվելու է այլընտրանքային էներգիայի օգտագործումը, պակասեցվելու է բնական գազի օգտագործումը։ Միջուկային էներգիայի օգտագործումը մնալու է կայուն, իսկ նավթամթերքները՝ կնվազեցվեն։
Դոկտոր Ուայթհեդը հստակ կարծիք հայտնեց առ այն, որ «Հյուսիսային հոսք» (Nord Stream) գազատարի կառուցումը նպաստելու է Եվրոպայում գազամատակարարման կայունացման խնդրին։ Այս հարցում պրն․ Գրիգորյանը լիովին համակարծիք էր դոկտոր Ուայթհեդի հետ։ Ըստ վերջինիս՝ եվրոպացիների հիշողության մեջ դեռևս թարմ է տարիներ առաջ Ուկրաինայի կողմից սեփական երկրով անցնող ռուսական գազատարից գազի կողոպտման դեպքը։ Ըստ ապագա նախարարի՝ «Հյուսիսային հոսք» գազատարն անցնում է այնպիսի երկրներով (Ֆինլանդիա, Շվեդիա, Գերմանիա), որոնք չափազանց կայուն են միջազգային հարաբերություներում, կանխատեսելի են և շատ ավելի վստահելի, քան Ուկրաինան է։
Հանդիպման ընթացքում կողմերը քննարկեցին նաև Լեյբորիստների իշխանության գալու պարագայում Եվրասիական միության հետ Մեծ Բրիտանիայի հարաբերությունների զարգացման ապագան։
Կողմերը պամանավորվեցին շարունակել համագործակցությունը, որը նպաստ կբերի Մեծ Բրիտանիա-Եվրասիական միություն-Եվրոմիություն հարաբերությունների զարգացմանը»։