Ամուլսարի գործով քննչական խմբի ղեկավարի մասով քննությունն ավարտվել է. իրավական առումով խախտում չկա
Ամուլսարի գործով քննչական խմբի ղեկավար Յուրա Իվանյանի մասով ծառայողական քննության արդյունքում պարզվել է. իրավական առումով խախտում չկա: Այդ մասին այսօր՝ հոկտեմբերի 21-ին, լրագրողների հետ զրույցում ասաց ՀՀ քննչական կոմիտեի նախագահ Հայկ Գրիգորյանը՝ անդրադառնալով Ամուլսարի հարցով հարուցված քրեական գործին:
Նրա խոսքով, Յուրա Իվանյանը որևէ շահագրգռվածությունչի ունեցել Ամուլսարի հարցի հետ կապված:
«Նա որևէ կապ չի ունեցել. քրեական դատավարության օրենսգրքի համաձայն, հստակ նշվում են, թե բարեկամական որ կապերի դեպքում է, որ անձը պետք է ինքնաբացարկ հայտնի: Իրենց ազգակցական կապի աստիճանը նշված չէ, ուստի զուտ իրավական առումով խախտում չկա»,- պարզաբանեց Հայկ Գրիգորյանը:
Նա նկատում է, որ այնուամենայնիվ գործը հանգուցալուծված չէ, քանի որ քրգործը դինամիկ պրոցես է և հնարավոր է, որ հենց այդ պահին ստանան այնպիսի տվյալ, որ գործը նոր զարգացում ստանա:
Հայկ Գրիգորյանը նաև հերքեց լուրերը, թե Յուրա Իվանյանը նոր պաշտոն է ստացել. ՀՀ ՔԿ նախագահի խոսքով, պարզվում է, որ կառավարության որոշմամբ ՔԿ-ում տեղի են ունեցել մի շարք կառուցվածքային փոփոխություններ և Յուրա Իվանյանի պաշտոնը պարզապես անվանափոխվել է:
«Եթե նախկինում նա ղեկավարել է սեփականության դեմ ուղղված, կոռուպցիան հանցագործությունների, կիբերհանցագործությունների դեմ ուղղված վարչությունը, ապա հիմա կիբերհանցագործությունների վարչությունն առանձնացվել է: Ինքը մնացել է նույն պաշտոնում, անունն է վերանվանվել»,-ասաց ՀԱյկ Գրիգորյանը: