Բաքվում փայփայում են միտքը, որ Անկարան մի օր էլ Հայաստանի վրա է հարձակվելու
Թյուրքական խորհրդի 7-րդ գագաթնաժողովից հետո ադրբեջանական մամուլում զարմանալի աշխուժություն է սկսվել։ Առանձին լրատվամիջոցներ իրենց սրբազան պարտքն են համարել հարցազրույցներ վերցնել ինչ որ փորձագետներից, կապված այն հարցի հետ, թե արդյո՞ք Հայաստանի Հանրապետության զինված ուժերը կկարողանա դիմակայել թուրքական հարձակմանը և եթե նման բան լինի, քանի օր կտևի այդ դիմակայությունը։
Մյուս կողմից էլ նույն ադրբեջանական մամուլը, սեփական վերլուծությունների և հայկական մեդիայում պտտվող առանձին հրապարակումների վրա հիմնվելով տարփողում է այն գաղափարը, թե գործող վարչապետ Նիկոլ Փաշինյանը դատապարտված է կործանման։ Ավելի հեռուն գնալով, նրանք փորձում են նույնիսկ Փաշինյանի հաջորդներին որոնել կամ մատնանշել։
Այս ամենն ինչ խոսք մի կողմից զվարճալի է, քանի որ ամիսներ առաջ, նույն ադրբեջանական մեդիան նույն ոգևորությամբ Փաշինյանի հասցեին դրվատանքով էր խոսում, հատկապես, երբ վերջինս հայտարարում էր, որ Ալիևը «կիրթ» է, սակայն մյուս կողմից էլ կարող է նույնիսկ մտահոգիչ լինել, եթե հաշվի առնենք, որ Ալիևը գագաթնաժողովի ժամանակ հայտարարեց, որ Զանգեզուրն է խանգարում, որպեսզի թյուրքական աշխարհը միավորվի, իսկ Էրդողանն էլ այդ խոսքը «թագավորեցրեց» ասելով, թե երազում է այն ժամանակների մասին, երբ կյանքի կկոչվի «մեկ ժողովուրդ վեց պետություն» բանաձևը՝ կրկին նկատի ունենալով թյուրքական ժողովուրդների միավորումը։
Ամեն դեպքում, որքան էլ տգետ լինեն, սակայն հասկանալի է, որ իրենց ամենանվիրական երազանքներում Բաքվում փայփայում են այն միտքը, որ Անկարան մի օր հարձակվելու է Հայաստանի վրա, ու ոչնչացնելու է թյուրքական աշխարհի կոկորդին մնացած ոսկորը։ Իհարկե հասկանալի է, որ նման բան չի լինի։
Այս ամենը հերթական անգամ էլի ու էլի ապացուցում է, որ հնարավոր չի լինելու, գոնե առաջիկա հարյուրամյակի կտրվածքով բարեկամություն անել Բաքվի հետ։
Յակոբ Բերգեր