Գրիգորյանը ցանկություն չունի մասնակցելու, Թովմասյանն էլ արձակուրդում է. ՍԴ-ի օրակարգում լիազորությունը դադարեցնելու մասին որոշման նախագիծն է
Քիչ անց պարզ կդառնա` Սահմանադրական դատարանի նախագահի լիազորությունները դադարեցնելու վերաբերյալ ԱԺ նախագիծը կընդունվի՞ ՍԴ վարույթ, թե՞ ոչ:
Այս մասին լրագրողների հետ զրույցում ասաց ՀՀ սահմանադրական դատարանի դատավոր Ալվինա Գյուլումյանը։
ՍԴ աշխատակարգային նիստն սկսել է վաղ առավոտից. օրակարգում նաև Հրայր Թովմասյանի լիազորությունները դադարեցնելու մասին որոշման նախագիծն է: Ինչպես տեղեկացրեց Ալվինա Գյուլումյանը, Հրայր Թովմասյանի լիազորություների հետ կապված հարցը կքննարկեն ավելի ուշ, և արդեն ընդմիջումից հետո պատասխան կունենան:
«Ենթադրվում է, որ որոշումն այսօր կլինի, հնարավոր է նաև աշխատանքային ժամերից դուրս քննարկումը շարունակվի, եթե որոշման չգնանք»,- ասաց ՍԴ դատավորը:
Թե ինչ դիրքորոշում ունեն դատավորները, չեն կարող հայտնել. Ալվինա Գյուլումյանի խոսքով, հնարավոր է կարծիքներ լինեն միայն վերջնական որոշում կայացնելուց հետո:
Հարկ է նկատել, որ ՍԴ դատավոր Վահե Գրիգորյանը հերթական անգամ նիստին չի մասնակցում. պատճառը, գոնե դատավորների համար, հայտնի չէ: Համենայն դեպս, Ալվինա Գյուլումյանը չգիտի այդ մասին, և միայն ենթադրում է, որ Գրիգորյանը պարզապես ցանկություն չի ունեցել մասնակցելու:
Ինչ վերաբերում է հենց իրեն` Հրայր Թովմասյանին, ապա թեև օրենքը չի արգելում նրան մասնակցել քննարկումներին, սակայն նա արձակուրոդում է, և չի մասնակցում նիստին:
«Հրայր Թովմասյանն արձակուրդ է ձևակերպել. նիստերը կանցկացվեն առանց նրա մասնակցության»: