Փաշինյանին հետաքրքրեց «զոքանչ» գրությամբ շոկոլադը. «Մի հատ էլ հակակարկտային շոկոլադ մտածեք» (տեսանյութ)
«Իմ քայլը հանուն Արագածոտնի մարզի» ներդրումային բիզնես ծրագրերի համաժողովի շրջանակում վարչապետ Նիկոլ Փաշինյանի գլխավորած պատվիրակությունը գտնվում է Արագածոտնում:
Շրջելով տաղավարների միջով, Փաշինյանը կանգ առավ ավստրիահայ մի գործարարի տաղավարի մոտ:
Վերջինս ներկայացրել էր «քավոր», «զոքանչ», «ներողություն» գրություններով շոկոլադներ:
Փաշինյանին հետաքրքրեց հատկապես «զոքանչ» շոկոլադը. «Սրանք նո՞ր են, ամենաշատը «զոքա՞նչ» է վաճառվում»,- հարցրեց նա, ինչին արձագանքելով, գործարարը ասաց. «Այո, բայց բիբարով»։
Ինչ վերաբերվում է «ներողություն» գրությամբ շոկոլադներին, ապա Փաշինյանը նկատեց, որ լավ կլինի, եթե քաղաքացիները պայուսակում ունենան միշտ այդ կոնֆետը. «Մեզ համար դժվար է դա արտասանել. դրա համար պետք է գրպանում ունենալ և ցույց տալ»։
Գործարարը նաև մի պատմություն պատմեց: Երբ նա առաջին անգամ Հայաստանում նստել է տաքսի և տեսել է ծաղկած ծառերը, զմայլված ասել է. «Ինչ լավ է, ծառերը ծաղկել են։ Նա ինձ կոպիտ ասաց՝ հեսա կարկուտը կգա ու սաղ կքանդի»։
Այս պատմության վրա բոլորը ծիծաղեցին: Փաշինյանն էլ առաջարկեց. «Լավ պատմություն էր: Մի հատ էլ հակակարկտային շոկոլադ մտածեք»։
Մանրամասները` տեսանյութում։