Պարոն ոստիկանապետ, ցանկանում են ինձ լռեցնել. Արիանա Հովսեփյանի նամակը՝ Արման Սարգսյանին
NEWSPRESS.am-ի հիմնադիր տնօրեն Արմենուհի (Արիանա) Հովսեփյանը ֆեյսբուքյան իր էջի միջոցով բաց նամակ է հղել Ոստիկանապետի ժամնանակավոր պաշտոնակատար Արման Սարգսյանին:
Նրա բաց նամակն ամբողջությամբ ներկայացնում ենք ստորև.
«Պարոն ոստիկանապետ,
Ձեզ է դիմում Հայաստանի Հանրապետության իսկապես հպարտ քաղաքացի՝ հույս ունենալով, որ Ձեր՝ այդ բարձր պաշտոնին նշանակվելով, սկսել է ապրել փոքր-ինչ ավելի օրինական երկրում:
Արմավիրի մարզում, ինչպես արդեն քանիցս տեղեկացրել եմ, ռեգիոնալ վարչության պետ Արամ Հովհաննիսյանի «բարձր հովանու ներքո» օրերս դաժան ծեծի են ենթարկվել Ռուսաստանի Դաշնության քաղաքացիներ:
Ինչպես ցանկացած հանցավոր երևույթի, առավել ևս բռնության մասին ես անկարող եմ լռել, և այս դեպքն էլ բացառություն չէր, հատկապես որ ծեծի ենթարկված երիտասարդներն իմ հարազատներն են:
Ուղիղ եթերների միջոցով բազմիցս անդրադարձել եմ հարցին և մերկացրել մարզի ոստիկանության մի քանի աշխատակիցների: Նրանց հարցով այլևս Հատուկ քննչական ծառայությունն է զբաղվում, որտեղ, ի դեպ, պատրաստվում եմ ցուցմունք տալ:
Եվ ահա, ինչպես և սպասվում էր իրենց պետերին փրկելու են նետվել ստորինները՝ բառի՝ Ձեր սրտի ուզած իմաստով:
Հարգելի պարոն ոստիկանապետ, սույն նամակով նաև տեղեկացնում եմ Ձեզ, որ Ձեր ենթակաները ոչ միայն սովորական բանդա կազմած, օրը ցերեկով անմեղ մարդկանց են ծեծում, այլև մի բան էլ ցանկանում լռեցնել ինձ արդեն այլ՝ զարտուղի ճանապարհով:
Բանն այն է, որ Ձեր ստորադասները որոշել են դիմել Հայաստանում ընդունված և հեղափոխությունից հետո իբր վերացած մեթոդին՝ ծանոթին: Նրանք, ինձ հասած տեղեկություններով ֆեյսբուքյան տիրույթում քիչ թե շատ հետևորդներ ունեցող օգտատերերին և հատկապես նրանց, որոնց գրառումները լրատվականները վերահրապարակում են, առաջարկում են «սևացնել», «փչացնել» ինձ... Փոխարենը ես չգիտեմ՝ ինչ են խոստանում Ձեր «խելոք» ենթակաները:
Պարոն ոստիկանապետ, ես գնահատում եմ Ձեր անցած ուղին, Ձեր՝ սպայի արժանապատվությունը, և միայն հանուն դրա է, որ լեզուս ատամներիս հետևում եմ պահում Ձեր՝ նույն այդ ենթակաների այլևայլ «ղալաթների» մասին չխոսելու համար: Ես և Դուք՝ առավել ևս, հասկանում ենք, որ սա ինչ-որ առումով փորձաշրջան է Ձեզ համար և համակարգը նմաններից մաքրելու գնով է նաև, որ կարողանալու եք հաստատվել այդ պաշտոնում և ավելի հանգիստ խղճով աշխատել:
Հակառակ պարագայում, պարոն ոստիկանապետ, Դուք, մենք և բոլորս տանուլ ենք տալու պետությունը, Հայաստան պետությունը, որը նմանները կամաց-կամաց դարձնելու են խուժանապետություն:
Ես շատ բան գիտեմ, այդ պետերի, պետիկների, նրանց անձնական կյանքի, վարքի, էլ չեմ ասում, թե որքան բան՝ նրանց ընտանիքների մասին: Բայց ընտանիքն ինձ համար սրբություն է եղել և կա, իսկ անձնական կյանքի տիրույթ, գրեթե միշտ, ինձ թույլ չեմ տալիս մտնել: Ես պատրաստ եմ նույնիսկ լռել, միայն թե սովորական մարդ ծեծողները համազգեստ չկրեն: Այո, պատրաստ եմ լռել, բայց իմ համբերությունն անսահման չէ և իմ դեմ ուղղվող աղեղները անպայման վերադարձնելու եմ այն ուղղողներին:
Սպասումով՝ ՀՀ քաղաքացի»: